ആതിരേ, ഈ ഇരവിലൊരു പനിമതിയായ്
എന്നിലുണരൂ നീയെൻ ദേവ സംഗീതമേ
കാതരേ, കടമിഴിയിലൊരു കവിതയുമായ്
നീയണയൂ ആർദ്രമെൻ പ്രണയസ്വരൂപമേ
ഏതോ വേണു ഗീതികളുയരുന്നു സാന്ദ്രമായ്
നീയോ, ദൂരെ മറയുന്നു വെൺ മേഘമായ്
ഹൃദയ വേദിയിലൊരു പ്രണയ നാട്യവുമായ്
പോരൂ വീണ്ടും പ്രിയമെൻ പൊൻ തിങ്കളേ
ജാതി പൂത്ത നരക വീഥികളിലിനിയും സഖീ
ജീവ പ്രേമ ജാതകം ചുട്ടെരിക്കുമാകയാൽ
കത്തി നില്ക്ക തീപ്പന്തമാവുക കാലമാകെയും പ്രിയേ
ദീപമാവട്ടെ വരും പ്രണയിനികൾക്കാകെ നീ
ഗന്ധർവ്വ യാമങ്ങളിൽ മെല്ലെ പൂക്കുന്ന സൂനങ്ങളിൽ
മൗന സോപാനം കയ്യേറി നീ അനുരാഗ ഗീതമാലപിക്കൂ
കൺ മൂടുന്ന ചട്ടങ്ങളിൽ കൊട്ടിയാട്ടുന്ന വേദങ്ങളിൽ
പൊട്ടിച്ചൂട്ടിന്റെ ആവേഗമായ് കെട്ടിയാടൂ ആരോമലേ
ഇനിയുമൊരു തിര വരുമെന്നായ് കനവിൽ തീരവും
വീണ്ടും വാക പൂക്കുമെന്നായ് കാത്ത് മൈനാകവും
സരിത്തൊക്കെയും തിരിച്ചൊഴുകുമെന്നായ് സാഗരവും
കാത്തിരിപ്പൂ, നീയുദിക്കും പൊൻ ദിനം കാത്തിവനും